政情：袁彌明抖抖氣 日本置業
香港政治形勢七國咁亂，移民潮不絕，人民力量主席袁彌明（Erica）自去年區議會選舉後冇乜聲氣，只係間中見佢喺社交網站宣傳自己盤生意，以及就立法會新界東補選留言，原來佢同丈夫林雨陽去年靜靜雞喺日本置業，唔通Erica都厭倦政治，想避走日本？
呎價萬元 大讚抵買
其實Erica無意退出政壇，更加唔係移民日本，只係有感成為公眾人物後，喺香港放假都好難有真正嘅休息同放鬆，加上本身好鍾意日本，每年平均去四次，所以去年初遊日時順便睇樓，四月扑槌喺外國駐日領事館聚集嘅六本木置業。Erica話，選址六本木係貪嗰區屬當地高尚住宅區，但樓價兌番港幣只係約一萬元一呎，絕對抵買，最重要係大廈接待處嘅職員識講英文，好快將日本當成第二個家鄉，平日單位就畀親友去日本旅行時入住。
一直有傳Erica九月會代表人力轉戰立法會香港島直選，屆時可能要同熱血公民鄭錦滿及學聯秘書長羅冠聰等激進派搶票，如果屬實，睇怕Erica無乜時間享受間新屋喇！