政情：行會老代新 專收舊電池
政府尋日突然宣布，現年四十二歲嘅民建聯主席、立法會議員李慧琼（Starry），即日起辭任行政會議成員，並由其黨友、已年屆六十四歲嘅立法會議員葉國謙接替，令行會非官守成員平均年齡急升至逾六十三歲。呢個「以老代新」嘅換人安排，本身已有違香港政壇近年嘅年輕化浪潮。眾所周知，葉國謙係去年政改方案表決「甩轆」嘅「元兇」之一，加上佢已鐵定玩到今年九月就棄選立法會退休，令人質疑本屬特區最高決策同諮詢機構嘅行政會議，已淪為前高官與退休建制派政客等「舊電池」嘅收容所。
甩轆元兇 葉知名度低
Starry自去年初接任民建聯主席後，一早已有意辭任行會，以免喺代表該黨批評政府時，受到行會嘅集體負責制「緊箍咒」嘅規限。但由於該黨欽定嘅行會繼任人選葉國謙捲入政改「甩轆」醜聞，換人計劃被迫無限期押後。隨住立法會換屆選舉臨近，政府民望持續低迷，該黨認為Starry急需與政府切割，以免影響選情，換人計劃因此喺北京人大政協兩會後重新付諸實行。
葉國謙除咗被指需為政改「甩轆」負責，本身從政多年亦唔覺有乜突出表現，知名度同民望向來唔高，加上佢已經就嚟合資格攞長者卡，並鐵定喺九月立法會換屆後退休，套用社民連「長毛」梁國雄嘅說法，係推翻咗達爾文嘅進化理論，令人質疑佢加入行會後會有何建樹，定係純粹係該黨成功將佢勸退嘅安慰獎或交換條件。
12非官守成員已「登六」
屈指一算，現有嘅十四名行會非官守成員，有十二人已年過六十歲，當中最少六人更年過六十五歲，搭車有兩蚊優惠，只得陳智思同張志剛仲未「登六」。其中林煥光、李國章、羅范椒芬及葉劉淑儀都係前高官，葉國謙、鄭耀棠、張學明、陳智思同胡紅玉等，則早已或即將淡出特區嘅立法機關。
現年五十一歲、已經係現任非官守成員當中最後生嘅陳智思，早前曾以「舊電池」自嘲，其他比佢年長一大截、早已屬政壇退休人士嘅行會成員，又應該用咩嚟形容呢？特區管治班子本已反應麻木、表現無能，再加上咁嘅行會班底，政府政策又點可能唔同市民大眾、尤其係年輕一代脫節呢？