中環出更：幫子女抗壓 名人剛柔並重
近期發生多宗學生自殺慘劇，有議員就歸咎教育問題，咁家教又點呢？卓妮早前喺馬場同多位名人談到與子女相處之道，其中理文造紙執行董事李文斌自稱係個嚴父，細微到小朋友嘅站姿都會糾正，要求企到直一直，佢覺得要畀小朋友自細學習面對同適應壓力先係最重要。
李文斌讓小朋友面對
李文斌認為，現時社會競爭激烈，有壓力係無可避免，如果子女去到大學甚至出社會工作時先發現唔識得面對壓力，到時會更難處理，不如等佢哋自細養成面對挑戰嘅習慣同正面思維。佢不時都會留意仔女情緒狀況，小朋友習慣咗後知道完成好目標就可以去玩，都顯得非常積極，佢又會畀女兒話事，入讀心儀學校。
青年工業家協會基金會常委顏吳餘英與丈夫顏培英及兒子兼百仁基金副主席顏志永亦有現身馬場，講起以前讀書有無壓力時，顏志永笑笑口話好彩細個時父母忙於打理生意，由婆婆負責照顧佢，所以讀書方面父母都無乜畀壓力佢。
顏太就話，以前啲人無咁緊張子女分數，個仔升到班就得，又笑個仔好怕死，所以唔使擔心佢做傻事喎！
保良局前主席鄭錦鐘就話，慶幸幾個仔女喺讀書成績方面都唔錯，毋須佢操心，亦無要求仔女一定要學啲咩興趣班。
鄭錦鐘甚少畀意見
不過，佢認為現時年輕人壓力來源可能係多方面，但「謀事喺人，成事喺天」，有時好多嘢唔係話計劃好就一定有理想結果，所以佢甚少對仔女嘅事畀意見，希望佢哋有較大自由度發展。
卓妮