「兩肩擔道義，鐵筆著文章。」東方報業集團發揮第四權功能，鍥而不捨揭露假難民問題，正正體現咗呢種精神，家陣社會各界要求港府盡快拆彈之聲此起彼落，足證正義傳媒有巨大影響力。
有人可能唔明白，點解日日都有假難民嘅新聞，其實原因好簡單，人蛇滾滾來，罪案日日有，假難民亂象不絕，如果唔係傳媒踢爆，港府家陣可能仲瞓緊覺，又點肯做嘢呢？唔係賣花讚花香，香港真係唔可以冇咗第四權（口架）。
唔使講咁遠，日前一名攞行街紙嘅非洲漢懷疑吸完冰毒後，喺尖沙咀街頭手握木棍夜遊，住客通知保安員報警，點知疑犯狂性大發，暴力拒捕，混亂間身上玻璃冰壺爆裂，碎片仲鎅傷一名警員添。另外，警方喺旺角搗破黑幫「毒窟」時，一名無證南亞漢亡命爬渠逃捕，由一樓飛墮落街爆頭重創。大家話嘞，假難民淪為如假包換嘅社會「毒」瘤，如果唔係傳媒報道真相，豈不是更加烏煙瘴氣？
除咗毒害，涉及假難民嘅搶劫、風化等罪案更加無日無之，令人不寒而慄。尖沙咀重慶大廈及中環蘭桂坊固然早已淪為人間妖域，家陣仲恐怖，幾乎全港各區無一幸免，搞到街坊提心吊膽。淨係元朗咋，近日已有幾單涉及假難民嘅罪案，有人喺遊戲機中心搶錢，有人當街搶劫，有人非禮少女，有人身上被搜出毒品。假難民無惡不作，居民人心惶惶，有人建議組織自衞隊防範假難民，你話香港究竟係乜嘢世界吖？計功夫茶話齋，港府無能，警方疲於奔命，市民除咗自衞之外，睇怕都冇其他選擇咯。難為港府仲話香港係安全城市，簡直係吹水唔抹嘴。
事實證明，假難民無法無天，令人忍無可忍。當局承諾盡快檢討機制堵塞漏洞，究竟有結果未吖？嗱，唔好又係大隻講吖。
正如古人話齋，臨禍忘憂，憂必及之。假難民源源不絕而來，唔止係社會治安毒瘤，而且係公共財政負擔，下年度港府用於假難民嘅開支高達十七億元，比本年度急升近兩倍，再咁落去，香港唔止陸沉，直情破產都似。
歸根究柢，假難民之所以有恃無恐，除咗司法包庇放縱之外，另一個主要原因係港府受《禁止酷刑公約》約束，綁手綁腳。近日各界要求「退約」嘅呼聲不絕於耳，連法律界人士都建議中央向聯合國爭取增設保留條款，令公約有關收容酷刑聲請人士嘅條文不再適用於香港，變相達到退出公約嘅效果。冇錯嘞，就算香港唔退出酷刑公約，由中央出面爭取另設條款，既可為香港拆彈，又不損國家體面，一舉兩得，唔好再猶豫不決喇。