旺角暴亂發生至今逾一個月仍餘波未了，公民黨「新丁」立法會議員楊岳橋當選唔夠一個月，已經速成學晒泛民主派嘅招數，尋日即刻同工黨何秀蘭以呈請方式要求立法會成立專責委員會調查旺角暴亂。不過，同泛民往績一樣，立法會餘下任期四個月都無，開唔開得成會都成問題，加上以呈請方式成立嘅委員會不獲《立法會（權力及特權）條例》保障，無權傳召證人，實際上是「無牙老虎」，二人搞場大龍鳳都係齋抽水，煲無米粥。
雖然呈請書獲二十四名泛民議員起身支持，超過《議事規則》要求的二十人起身嘅門檻而過關，但何秀蘭隨後即認衰，承認要成立呢個專責委員會之前，仲有好多委員會排緊隊，包括有關高鐵工程延誤嘅委員會仲寫緊報告，另有兩個關於前年佔領行動嘅專責委員會緊隨其後，未開展工作，要喺剩餘任期調查旺角騷亂嘅機會微乎其微，但佢仍然死撐泛民咁做，係希望將呢個要求記載喺會議紀錄內，呼籲下一屆議員要正視有關紀錄喎。
立法會經歷泛民連串拉布行動幾乎癱瘓運作，難得開始重回正軌傾正經事，泛民都要為咗留個紀錄而要求成立一個開唔到嘅委員會，甚至今屆嘅事要下屆跟進，唔知仲有咩好跟進呢？莫非泛民想將暴徒變成良民？