中環出更：蘇錦樑自爆 領跑變陪跑
不少人在公餘時間都鍾意做義工，服務社會之餘，又可以充實自己，仲有機會遇到好多特別經歷添！好似商務及經濟發展局局長蘇錦樑（Greg蘇），早前出席「HK.WeCARE 香港開心D」大型義工同樂日時話，最難忘就係有一次去做失明人士嘅領跑員，點知對方仲跑得快過自己，對佢有好大啟發喎！咁嗰位失明人士咪要掉轉頭做Greg蘇嘅領跑員？咁呢個經歷真係好難忘喎！
同樂日仲有多位名人參與，包括香港提升快樂指數基金主席吳宏斌、副主席鍾志平（Roy）及和富社會企業會長李宗德（Joseph）等，Joseph同Roy兩個嘅共通點，就係自細已經開始做義工。
李宗德義工由細做起
Joseph話讀喇沙時，學校已經有唔少義工團體，佢第一次參加嘅就係聖母軍，當時跟住去探訪有需要人士，就種下做義工嘅種子，至今就已經做咗幾十年義工，覺得可以識到好多朋友，又好有滿足感，仲將呢個優良傳統傳埋畀兩個女兒添！
Roy就話，自己至今已經做咗幾千小時義工，做公職都係因為覺得好似做義工咁，認為幫人嘅感覺好好。
中電企業發展總裁莊偉茵就同丈夫黃楚權一齊到場，佢話平日工作實在太忙喇，想做義工就會參加企業嘅義工隊，至於丈夫就去非牟利機構幫手，看來佢哋兩公婆對社會服務都好有心喎。
卓妮