潮流興有機食品，即使價錢昂貴，亦賣到成行成市，愈來愈普遍，可惜吖，價錢貴唔代表係好嘢，如果你認為有機食品一定靠得住，咁就錯嘞。
呢，消委會測試市面一百二十七種蔬菜樣本，發現當中七十五個所謂有機蔬菜樣本中，二十八個即高達三成七被驗出含殘餘除害劑，而驗出含重金屬嘅樣本亦有十二個。菜心成為重災區，二十一個樣本中有十八個含除害劑，其次係番茄，十五個樣本中十一個驗出含除害劑，而一款有機紫番薯及一款玉豆除害劑「毒死蜱」嘅含量更加超標添。
顧名思義，有機蔬菜即係指種植過程冇使用農藥及化肥，純粹使用天然肥料。而根據當局嘅定義，「從生產、處理、加工到銷售階段均按照有機標準，並經來源地認證機構或管理當局認證的食物，方可稱為有機。」好明顯喇，市面上唔少蔬菜等食品掛羊頭賣狗肉，完全同「有機」無關。
正所謂，天下熙熙，皆為利來，有機產品價格比一般產品貴得多，不法商人博懵一啲都唔出奇，尤其係港府唔監唔管，至今未有專門法例針對有機產品，更導致濫竽充數，消費者無所適從。香港話就話有相關機構為有機食品認證，但只屬志願性質，冇權執法，就算發現有人魚目混珠，亦束手無策。
曾經有項調查顯示，喺受訪嘅菜檔及魚檔中，分別只有百分之五及百分之一售賣獲認證嘅有機蔬菜及水產，其餘聲稱售賣有機食品嘅商販，多數喺包裝或價錢牌寫上「有機」、「天然堆肥」、「無農藥」等字眼，擺明想博懵。正如負責調查嘅機構話齋，即使有人以普通產品冒充有機產品，當局最多亦只能引用《商品說明條例》提出警告，完全冇阻嚇作用，建議當局加強監管，推行標籤制度，完善有機市場嘅規範及發展，保障消費者權益。可惜吖，你有你建議，官僚有官僚卸責，有機食品通街都係，而當局至今未推出任何監管措施，問你服未。
當然喇，今時今日問題食品無處不在，有機蔬菜淪為毒菜只係冰山一角咋。消委會去年九月去信本地九間大型連鎖快餐集團，要求分階段淘汰以抗生素飼養嘅禽畜，結果反應冷淡，冇一間肯承諾全面取締抗生素食材。其實又難怪嘅，港府闊佬懶理，而法例又無列明飼養動物不可濫用抗生素，快餐集團又點會自綁手腳吖。
所以話，官僚靠得住，豬乸會上樹。香港超過九成食品由外地進口，偏偏港府把關不力，食品安全防線如同虛設，每逢大陸同台灣出事，香港例牌受到池魚之殃。事實證明，家陣唔止有機蔬菜信唔過，港產官僚更加靠唔住，大家自求多福吖！