性感迷人嘅美女令男士神魂顛倒，縱然佢哋並非刻意性感，但係佢哋舉手投足都散發出誘人魅力，有人稱呢類美女為「酒不醉人人自醉」，好似郭婉祈就係最佳人辦，佢隨意擺個甫士，美態足已令人迷醉。
嚟自北京嘅郭婉祈，喺鏡頭前熟練地擺甫士，並且以性感造型示人，如此專業態度，當然係經過時間浸淫先至做得到。佢坦言，出道前從未諗過成為模特兒，只係一次偶然嘅機會下，參加「第6屆中國模特之星」大賽，獲得最受歡迎獎，從此展開模特兒生涯。憑住亮麗嘅外形，加上令男人流晒口水嘅前凸後趷身材，令佢好快就喺模特兒界闖出名堂，先後喺多本時裝、男士同潮流雜誌中亮相，甚至成為御用模特兒，足見佢嘅實力有幾咁強勁！
當然作為一位模特兒單憑外形係唔夠嘅，最重要係付出努力，先至可以獲得好成績。正如婉祈所講：「上帝讓我成為一個有實力的人，而不是一個好看的布娃娃。」從呢句說話可以睇得出，佢唔希望大家只欣賞其外表，應該多留意到佢嘅演出同背後付出嘅努力。至於佢點睇自己嘅性感寫真呢？佢就話性感嘅造型只不過係展現美態嘅方法，最重要係大家從藝術角度欣賞佢嘅寫真。
事實上，婉祈喺擺甫士同行天橋嘅步姿上下過唔少苦功，更鑽研時裝設計同化妝技巧，佢表示希望能夠從時裝設計師嘅角度出發，掌握到設計理念，當佢行騷時，便能更充分演繹出作品嘅神髓。至於學化妝，佢就話可以透過妝容令自己睇起嚟更加迷人。
話說回來，其實喺佢加入模特兒界前，本身打算從事乜嘢工作呢？相信大家都唔會估得到，原來佢夢想當調酒師。性感迷人嘅調酒師對男人嚟講梗係吸引，之但係最緊要有實力，否則拎起杯酒呷一啖，就知道有冇料到。不過呢個問題絕對唔會喺婉祈身上發生，事關佢真係付出過努力，朝住調酒師嘅夢想進發。唔講唔知，阿妹早就獲取全國調酒師中級嘅評級，係個貨真價實嘅調酒師，唔係只得個殼o架。雖然佢的確有實力喺調酒界發展，但目前對佢嚟講，最重要係做好模特兒嘅工作，呢個先至係佢現時最大嘅夢想。
簡介：郭婉祈出道之後主力喺模特兒界發展，及後佢同其他內地女模一樣，踩入影視界實行多棲發展，上年佢就參與多部微電影演出，並且一嘗女主角滋味。如果想知道阿妹更多消息，記得要緊貼佢嘅微博喇！
網址：www.weibo.com/u/2391142683?is_hot=1
出生地：北京
身高：175cm
三圍：34、25、36
撰文：魂