沒有最低，只有更低！港大民意研究計劃尋日發表新一輪嘅特區管治班子民望調查結果，十三名問責局長當中，有六人嘅淨支持率下跌、三人不變、僅四人微升。當中教育局局長吳克儉嘅民望再度插水，有多達六成三受訪者反對佢留任，得一成六支持佢繼續做落去，淨支持率較上月再跌四個百分點，已經記唔清係佢第幾次民望包尾，名副其實係「唔得掂」！
若以跌幅計算，本月仲有三名局長嘅民望跌得勁過吳克儉，佢哋分別係商務及經濟發展局局長蘇錦樑、勞工及福利局局長張建宗同民政事務局局長劉江華，三人嘅淨支持率不約而同大跌八個百分點，估計係同版權法爭議、亞視欠薪及星光大道擴建事件有關。
整體而言，十三名局長當中有五人嘅淨支持率為負數，即係反對佢哋留任嘅受訪者多於支持，佢哋分別係吳克儉、蘇錦樑、劉江華、發展局局長陳茂波同創新及科技局局長楊偉雄。其中上任無耐嘅楊偉雄，淨支持度只係僅僅負百分之一，睇趨勢應有望升番上正數，希望佢繼續努力，其他人睇嚟就好難救得番喇！