政情：「庭」「鋒」跳船 學民勢空

學民成立近五年，於一二年反國教一役聲名大噪，此後多次於遊行籌款吸金能力，均較傳統泛民有過之而無不及，成為政界一股新興勢力，之不過隨着有學民中人對參選蠢蠢欲動，變化亦隨之而來，據報最近數月，黃之鋒、黎汶洛等學民核心有份聯同專上學生聯會、學者及文化人等組成新黨，最快於下月正式成立，首批黨員暫有廿五人，據知黃之鋒及周庭好大機會榜上有名。

然而，黃之鋒等人如有意加入新黨，首要處理係自身於學民職務，因為學民有規定身為召集人、發言人唔可以同時係其他組織成員，據知學民將會舉行會議，除咗討論來年計劃，另一重要議題就係商討係咪應該維持有關規定。

有傳周日將解散

據了解，學民內部有意見認為，佢哋成立目的始終唔係為咗參政，為咗同政黨有所區別，未必會改變現有規定，如果最終鐵定通過維持不變嘅決定，據知黃之鋒、周庭及中大神學院學生林淳軒均打算退出學民，全心投入新黨工作，雖則學民現任發言人黃子悅有意留守，但尋日深夜時分傳出學民周日會解散，學民於一批核心出走後，號召力會否大減，答案似乎不言而喻。

對於新黨同學民關係，有人形容可以倣效個別泛民與取態相近民間團體形成嘅關係，就唔同議題都可以合作，但又唔使「綁死一齊」，令人聯想學民嘅定位變為政黨嘅衞星組織？

新黨劍指兩區直選

講番新黨成立後首項重點工作，就係公布出選九月立法會選舉名單，據知九龍東及香港島直選，很大機會分別由黎汶洛及即將卸任學聯秘書長嘅羅冠聰出選，至於其他區嘅部署仍有待商討敲定。