中環出更：楊全盛未參選先轟莫乃光

九月立法會選舉嘅戰幔已經打開，除咗建制泛民陣營為五大地方直選出線爭崩頭，功能界別嘅卡位戰亦提早展開，而且傳出陣陣火藥味，其中資訊科技界被視為其中一個主戰場，外界盛傳軟件行業協會會長楊全盛（Eric）會挑戰現任業界議員莫乃光（Charles），Eric尋日牽頭成立智慧城市聯盟，並出任聯盟召集人，隨即一副戰鬥格炮轟Charles未能代表業界，而且意有所指若然有人姑息立法會拉布，其實等同拉布，將影響二千多名業界從業員無糧出。
莫乃光
莫乃光

成立聯盟 群星拱照

尋日智慧城市聯盟成立群星拱照，三任互聯網專業協會會長鄧淑明、葛珮帆及洪為民均有現身，又有多個星級公司機構參與，例如數碼港、科技園、港燈、微軟等；官場方面就有多名副局長及政治助理，分別係創新及科技局副局長鍾偉強、發展局副局長馬紹祥及政治助理馮英倫等，唔講仲以為係Eric提早進行造勢活動。

楊全盛
  • 楊全盛

Eric接受傳媒訪問時重申，聯盟嘅工作同選舉絕對無關，但對於係咪會參選答得好小心，表示尋日未決定係咪參選，當被問及資訊科技界係咪要換人時，佢則以「今年九月，拭目以待啦」為回應，認真令人對佢係咪參選有無限聯想。

卓妮

第一手消息請下載on.cc東網iPhone/iPad/Android/Windows Phone Apps