中環出更：學生唔聽教 張忠柟 憑歌消氣
港澳台灣同鄉會（同鄉會）早前舉行新一屆理事會就職禮暨周年晚宴，新任會長林華琴（Judy）成為該會成立廿七年來的第二位女會長，一眾台灣幫包括珠海學院校長張忠柟、國際華商協進會會長羅台秦及春風合唱團指揮曹樹華等人都現身支持。曹樹華爆料話，張忠柟係該合唱團嘅男高音，唱功十分了得。張忠柟就搞笑話，佢唱歌只為消氣，有時喺學校畀學生激親，想鬧人時就閂埋門喺辦公室內高歌一曲，好快就怒氣全消喎！
林俊杰推廣「時光之旅」
曹樹華話，當年創辦合唱團係以台灣人為主，諗住鄉親聚會除咗食嘢傾偈，都可以唱吓歌，依家團員有埋香港人及內地人。羅台秦就話六月份曹樹華將在文化中心搞一場音樂會，係慶祝國際華商協進會成立三十周年嘅重頭節目之一。
香港台灣圈中有唔少低調實業家，做鐘錶生意嘅同鄉會名譽會長林俊杰就係其中之一。
林俊杰話，佢喺內地開錶廠逾四十年，亦自創腕錶品牌於香港銷售。由於太鍾意呢行，最近佢打算喺惠州搞一個名為「時間之旅」嘅文創區，旨在推廣古今有關曆法及計時等知識。
同場仲有博愛醫院總理李豐年及父親「糧油大王」李廣林嚟捧場。新上任嘅Judy最關心嘅始終係慈善，佢話早前一班同鄉聯手為台南地震災民籌款，成績唔錯，下個月佢將返台灣親自將善款送到災民手中。
卓妮