穆迪下調香港評級展望至「負面」，事實上，因受環球經濟影響，本港經濟上半年睇怕唔會理想，至於下半年，唔好講其他，單是受到「假難民」尾大不掉，加上南亞人蛇不斷滾滾來；加上本土激進派，時不時玩吓嘢……未來亂象紛呈，香港未來，幾可肯定，不會再有「歡言得所憩，美酒聊共揮」矣！
穆迪唔睇好香港，其中亦滲透了「中國因素」，除了中港雙方對一國兩制有不同的解讀，加上中國經濟增長減弱，會嚴重削弱香港嘅經濟表現，換言之「背靠祖國」未必有運行！之不過，老朽認為，唔背靠祖國，則幾乎肯定死路一條！家陣旅遊業不振，零售餐飲嗌救命，此「驅蝗」之惡果也！鬍鬚曾對穆迪下調香港評級不以為然，不作檢討就直指「中國風險」是「中國機會」，呢個唔知係唔係有「科學」嘅「邏輯」？哲學大師馮友蘭曾在一篇文章《為甚麼中國沒有科學家》說：「中國沒有科學家，是因為按照她自己的價值標準，她不需要」；鬍鬚曾未知是「官到冇求」還是「人在江湖」必須為阿爺送上鞋油，把「風險」依自己價值標準，解說成「機會」？
穆迪是否「錯估形勢」，風水佬就話呃你十年八年，鬍鬚曾自我感覺良好，無視香港亂象如絲麻糾纏，好似小小一個立法會，日日夜夜上演「拉布、剪布」鬧劇，「尊貴議員」淪為政棍流氓，建制保皇、激進泛民互相指摘叫囂，亦不過是侏儒摔角，套王祖藍扮師奶嘅口頭禪：「我接受唔到囉！」
香港未來，依老朽判斷，應該係「白鱔上沙灘，唔死一身潺」！鬍鬚曾係「另類中產」，大可以學孔子「君子謀道不謀食」，精神至上做其超級無敵掌門人，平民百姓如老朽，要謀食不謀道，險中求生，苦過弟弟也。