政情：楊岳橋不愛磚頭愛舖頭
一批暴徒於旺角新春暴亂事件，參與掟磚頭、隨處縱火，事後社會對有關行徑強烈譴責，連當時仍未當選立法會議員嘅大律師楊岳橋（Alvin），有份向被捕人士提供義務法律支援，都惹來外界質疑，不過話雖如此，Alvin對於外界俗稱買樓就係買「磚頭」，似乎暫時冇乜興趣，事關根據佢最新嘅個人利益申報內容，佢未有申報持有任何住宅單位，而同家人一齊持有嘅舖位，亦係其家人早年買入。
Alvin於上月底新界東補選勝出隨即履新，其個人利益申報內容於上周五曝光，而身為首名「八十後」議員，雖然最近樓價向下調整，Alvin原來無持有「磚頭」，係揸舖唔揸樓嘅一族，另外申報係一間投資有限公司嘅執行董事。
與屋企人持有投資公司
Alvin接受查詢時話，佢同屋企人共同持有一間公司，位於元朗嘅細舖位係該公司名下嘅物業；至於該間投資公司嘅名稱有佢媽媽個名，佢本人身為公司嘅執行董事，但其實係冇支薪。
當問及若然樓價再下挫，會否就睇準時機入市，Alvin話冇咁多詳細計劃，似乎身為專業人士嘅Alvin，打算睇定啲先，冇諗住為上車而急住買「磚頭」。
EQ助楊全盛惹助選猜測
另一方面，資訊科技界出身嘅建制派議員葛珮帆（EQ）亦更新其利益申報內容，佢於今年初新增申報自己係「智慧城市聯盟有限公司」嘅非受薪董事，而事有湊巧，呢間公司正係軟件行業協會會長楊全盛等業界人士創辦，外界更盛傳楊全盛有意九月出戰資訊科技界，硬撼現任業界議員莫乃光，因此，EQ此時加入楊全盛有份創辦嘅公司，令人聯想係咪已歸邊為對方助選。
EQ接受查詢時否認成立呢間公司係為咗幫楊全盛助選，強調於幾年前已經開始構思推動香港成為智慧城市。究竟呢間公司成立目的係咪與選舉無關，只係單純為香港成為智慧城市出一分力，時間或可以證明一切。