有人話，後知後覺唔緊要，無知無覺最可怕。真係冇講錯（口架），港產官僚胡混度日，得過且過，明顯屬於無知無覺嗰種，唔怪得香港七國咁亂、危機四伏喇。
話說天水圍嘉湖山莊對開、濕地公園自然保育區出現一個泥頭山丘，引發居民恐慌，亦揭發當局多年來對非法傾倒泥土隻眼開隻眼閉。有區議員踢爆，早喺○三年已經發現有人喺上址傾倒泥頭，甚至試過一日有幾百架泥頭車出入，佢○七年去信規劃署要求各部門跟進，點知好似泥牛入海咁，無晒下文，當局九年來一直「零檢控」，佢忍無可忍之下，向申訴專員公署及立法會申訴部投訴規劃署、屋宇署以及土木工程拓展署等部門失職及行政失當。
嗱，呢啲咪就係無知無覺囉。泥頭山丘已存在十幾年，當局一直闊佬懶理，關人個關，直到傳媒踢爆至肯做嘢，話會勒令土地擁有人採取噴漿等措施防止情況惡化喎。問題係，泥頭山經過多年堆積，已有足足兩個足球場大，四層樓咁高，當局依家至嚟補鑊，仲有冇再遲啲呀？
講開又講，類似嘅都市炸彈無處不在，泥頭山只係冰山一角咋。繼天水圍之後，將軍澳同新田先後發現有人非法挖掘及開墾土地，其中將軍澳一處山坡嘅泥頭更達到三米咁高，都咪話唔誇張。再咁落去，隨時重演深圳塌泥慘劇，死得人多（口架）！
正所謂，三個和尚無水飲。非法傾倒泥頭問題涉及多個政府部門，官僚互相推卸，互相扯皮，結果咪搞成咁囉。話時話，港府卸膊文化早就根深柢固，由取締僭建物到打擊店舖阻街，都係拖拖拉拉，虛應故事，審計署及申訴專員公署唔知批評過幾多次，可惜講者自講，官僚唔係當耳邊風，就係意見接受態度照舊。
冇計喇，港產官僚一向奉行多做多錯、少做少錯、唔做唔錯嘅哲學，好似四方木咁，踢極都唔郁，旨意佢哋把關，蚊都瞓蛇都死。好似假難民問題咁吖，已經唔係一朝一夕嘅事，港府長期放任自流，中門大開，以致尾大不掉，「南亞兵團」源源不絕蜂擁而至，姦淫擄掠，無惡不作，部分甚至被本地黑幫招攬從事犯罪活動，搞到香港幾乎陸沉咁滯。如果唔係東方報業集團發揮「第四權」天職，連環踢爆假難民亂象，港府可能仲發緊夢，有人形容港府「冇神經」，可謂一針見血。
美國前總統傑弗遜就講得啱嘞：寧可有報紙而冇政府，亦唔可以有政府而冇報紙。港產官僚渾渾噩噩，尸位素餐，有政府等於冇政府，如果唔係傳媒發揮監察功能，踢爆種種問題，香港只會更加烏煙瘴氣，更加暗無天日吖！