政情：人仔貶值 廠商賺匯水輸訂單
好多喺內地設廠做出口生意嘅港商，過去十幾年因人民幣一路升值而苦不堪言，最近人仔開始貶值，照計一班廠商應該笑呵呵喇！不過，做電鍍環保廠嘅中華廠商聯合會（廠商會）會董吳國安（安哥）就呻話，弊在依家經濟市道唔好，工廠訂單大跌，因為人仔跌而賺到嘅匯水都幫補唔到公司盤數，認真慘情。
安哥話，依家經濟不景，生意難做，所以幣值升跌已經唔係咁緊要。如果有得揀，寧願好似往日經濟好景時咁樣，訂單多，人仔升啲又有乜所謂喎！
喺內地做歐洲高檔家具入口批發生意嘅廠商會傢俬裝飾業委員會主席羅富國都有同感。佢話，人仔跌令生意雪上加霜，不過更難過嘅係內地地產市道唔好，連帶對家具需求都少咗。佢形容，當下慘況係佢打入內地市場廿幾年來少見，希望可以安然捱過呢一波經濟寒冬。