政情：區會新「星」 老婆係港大校花
去年區議會選舉之後，唔少政黨都立即部署今年九月立法會選舉，我哋尋日就提到泛民主派有意搵獨立嘅新任東區區議員王振星出戰工程界功能界別議席，但佢就以要專注地區事務為由拒絕。話口未完，王振星嘅地區辦事處尋日開幕，唔止東區區議員出席撐場，王振星仲帶埋靚老婆、任職大律師嘅Deborah現身添！聽聞Deborah當年係港大校花，估唔到依家仲保養得咁好，一出場絕對唔輸蝕畀同場嘅後生女！
議辦開幕 大舞麒麟
王振星位於太古城嘅議員辦事處開幕，東區泛民會議副召集人趙家賢及擊敗鍾樹根嘅漁灣區議員「傘兵」徐子見都有出席。由於王振星係由新民黨成員手中搶到議席，佢兩公婆就喺場大玩舞麒麟兼為麒麟點睛。王振星話，雖然個舖位只有二百幾呎，但都夠佢搞吓興趣班同會見街坊，佢嚟緊會搞一個有關紙藤嘅興趣班，希望有咗辦事處可以多啲機會同街坊交流。