政情：無人接莊 學聯等摺埋

佔領行動期間，「沒有大台只有群眾」嘅思潮遍徹金鐘，隨後學界就爆出退聯潮，港大、理大、浸大及城大都相繼透過校內公投退出學聯，雖然之後退聯潮算係暫時平息，但學聯嘅影響力大減。點知禍不單行，早前多間大學學生會舉行換屆選舉，均由本土派學生會勝出，似乎學聯即將出現下一次退聯潮危機。

認受性變低 苟延殘喘

作為學聯僅餘五間成員院校之一嘅中文大學，本土派候選內閣「星火」成功當選學生會，而星火嘅成員中，唔少曾經表態支持中大退聯，所以佢哋任內再搞退聯公投亦不出奇。另一成員院校樹仁大學學生會，內閣「仁本」主打本土旗幟，主席更加因為涉及燒垃圾桶而被捕，若能夠解決校內舉行公投嘅技術問題，相信都會搞退聯公投，到時學聯成員或會再少兩個。

對於本土派危機，學聯秘書長羅冠聰接受查詢時表示，學聯本來就係包容不同聲音及意識形態，如果同學真係選擇退聯，佢亦無得擔心，要尊重同學選擇。佢承認，學聯認受性因為成員組織減少而變低，未來只能搵機會嘗試組織同學，但強調學聯唔會瓦解。有人講笑話，現時學聯同亞視嘅情況差不多，苟延殘喘。

現屆無功績 潰不成軍

另外，對於距離換屆大約只有大半個月，都仍然未能覓得接任人選，羅冠聰話，學聯現時至十八號都會收秘書長人選提名，承認暫時一個提名都未有，但認為毋須擔心。外間一直有傳，羅冠聰於任期之後，就會同學民思潮組黨參選九月立法會，但佢成個任期都好似無心戀戰，亦未見功績，學聯喺佢手上亦搞到潰不成軍，究竟一個無功課交嘅秘書長，係咪可以單憑學生領袖光環就能夠進入議會呢？