中環出更：離地CY飯後水 政商界齊潑冷水
特首梁振英（CY）早前提出喺中環起泳棚或釣魚區，讓上班族利用午飯時間游泳或釣魚，呢個「離地」建議一出，旋即引起一陣譏笑及批評，連外國傳媒都恥笑埋一份。日前多名政商界人士出席全港各區工商聯春茗時，講起呢個話題都話得啖笑。工商聯會長李鋈麟就話，中午食飯淨係搭電梯落樓都要十分鐘，扣除來回即剩低四十分鐘，行到海邊只能游十分鐘就要上返嚟，咁趕不如「去廁所洗個面好過」喎！
李鋈麟仲話，游完海水一定要沖涼及吹頭，所以一個鐘肯定唔夠時間，除非放飯有兩個鐘喇！同場嘅立法會議員謝偉俊都話，佢平時游水四十五分鐘，加上沖涼同焗桑拿都要個幾鐘，所以如果中環打工一族中午要食飯，就根本游唔切水。
「中環唔適合起泳棚」
工商聯秘書長陳俊達（Allen）同會董劉彥翹就認為，中環唔係起泳棚嘅合適地點，事關維港水質唔好，而且填海導致水流湍急，唔適宜游水。再講泳棚都有啲危險，好似小西灣泳棚就曾經發生泳客被快艇整傷隻腳意外，加上附近域多利道已經有市區泳棚，有心游水嘅人已經游緊。
教育局局長吳克儉（吳得掂）都有到場，卓妮問佢CY呢個建議究竟可唔可行，佢無直接回答，但就話自己試過夜晚九點幾游水半粒鐘，游完個人舒服好多，形容做運動最緊要係抽時間，仲話以前喺商界工作時，好多同事都會食沙律當午餐，再偷時間游水同跑步。吳得掂咁講，唔通係盲撐CY？
卓妮