正所謂，橋唔怕舊，最緊要受。電話騙案手法層出不窮，日新月異，最近更加係花樣翻新，無奇不有，市民千祈要打醒十二分精神吖！
呢，數字冇花冇假，警方接獲假冒內地官員嘅電話騙案持續增加，由一四年只有二十三宗，大幅飆升六十倍至舊年嘅一千四百二十三宗，淨係舊年七月就有一千宗，問你怕未。雖然之後稍為回落，但隨着騙徒微調犯案手法，最近又掉頭上升，今年至今已經有五十多名市民中招，涉及款項高達七千七百萬元，其中元朗一名「隱世富豪」更加被騙五千八百萬元，創同類案件損失金額新高，都咪話唔誇張。
騙徒到底有咩新招？其實無非又係新瓶舊酒啫。佢哋會先聯絡受害人訛稱對方郵包藏有違禁品，再以更改來電號碼嘅程式，假扮內地官方號碼騙取受害人信任。騙徒之後又會假扮檢察官致電事主，聲稱可以幫佢哋進行特快查辦證明清白，並要求對方按指示提交保證金及下載釣魚程式，然後喺網上調走受害人資產。
其實，電話騙案唔係今時今日至有，假扮內地官員更加係常見嘅招數，最特別嘅係詐騙集團分工愈來愈精細，組織愈來愈嚴謹，手法愈來愈先進，由以往最簡單嘅「打盲毛」式電話行騙，進化到今時今日發短訊、用網絡電話改號以至盜取微信帳號等，五花八門。咪以為只有普通市民受騙，社會名流一樣無法幸免，試過有二胡大師夫婦被騙二千萬元；又有全國政協委員懷疑手機被勾線，騙徒假扮當事人致電多名全國政協委員，訛稱喺內地出事急需一筆錢「營救」，結果真係有人上當。
話時話，近年電話騙案早已廣為報道，政府仲成日宣傳「時刻保持精明，騙徒無所遁形」，點解仲不斷有人中招呢？原因好簡單，道高一尺、魔高一丈，市民精明騙徒更加精明，尤其係今時今日中港交流日益頻繁，不法之徒事先做足功課，講得出受害人身份背景，更令人防不勝防。
當然喇，萬騙不離其宗，雖然騙徒手法花樣多多，但來來去去都係嗰幾招啫，唔係威逼利誘，就係利用事主貪小便宜嘅心理。所以話，市民只要提高警覺，保持冷靜，時刻謹記「便宜莫貪」嘅教訓，騙徒自然無所施其技。
講到底，要杜絕電話騙案，市民固然要打醒十二分精神，官僚一樣唔可以瞌眼瞓，除咗加強同境外執法部門合作，從源頭堵截騙案，亦要追上科技發展，提升裝備，否則只會野火燒不盡，春風吹又生，香港遲早淪為騙案之都嘅咋！