「佔領中環」發起人戴耀廷喺佔領行動之後潛水摺埋，最近又再蠢蠢欲動提出「雷動計劃」，呼籲泛民喺今年九月立法會選舉時協調，希望取得過半數議席，仲建議要喺選舉投票當日進行民調，在最後階段由義工團隊按所得數據，將選票投給有需要嘅候選人。民建聯（民記）立法會議員梁志祥話，有關做法「我哋一早做緊啦！」寸爆戴耀廷以為自己「發現新大陸」。
梁志祥尋日同傳媒聚會時話，過往嘅立法會選舉，義工同助選團隊就會留待最後階段先出動投票，目的就是方便配票畀得票可能較低嘅候選人。以一二年立法會選舉為例，佢出選新界西選區，大約有一千名助選人員，而民記喺同一選區有三名候選人，預計大約共有三千票，可以喺最後關頭調動投票。
雖然未必「人人都聽你支笛」，但梁志祥話，如有七成人跟隨，已起到一定作用。事實上民記一二年派出三隊，最後亦成功取得三席。泛民依家都仲質疑緊「雷動計劃」嘅可行性，人哋已經有成功例子，真係同戴耀廷一擔擔，都係咁後知後覺。
梁志祥又估計，如果佢角逐連任新界西議席，至少要取得四萬三千票先有望連任，更謂︰「冇三萬五（當選）呢支歌仔唱o架喇！」