政情：本土派搶攻 公文袋九月危危乎

近半「琦」票原屬泛民粉絲

香港研究協會尋日公布新界東補選跟進民調，發現四百一十名受訪新界東選民中，三成半人投票係為懲罰某候選人、政團或派別嘅立場。至於投畀梁天琦嘅受訪者，有兩成半人係人力或社民連嘅支持者，但意外嘅係，有一成九人係公文袋支持者，顯示有支持者不滿楊岳橋或嫌棄公文袋立場而轉投梁天琦。不過，有三成八投畀梁天琦嘅受訪者係「其他政團」嘅支持者，反映現有傳統泛民政黨未能代表佢哋，意味成為激進本土派嘅鐵票。

事實上，有分析指隨住激進本土派崛起，加上年輕人開始嫌人力及社民連「老餅」兼不夠激，跌票係必然，另一得把口的公文袋亦緊隨其後成為箭靶，其中九龍東接替梁家傑嘅機師譚文豪及楊岳橋，選情可能出現暗湧。至於有意再戰香港島直選嘅陳淑莊，以及競逐連任新界西嘅郭家麒，因為同區分別有不夠激嘅工黨何秀蘭同李卓人「墊底」，而九龍西毛孟靜本身已經食正「本土」條水，料陳、郭、毛可穩守議席。

機師着陸九東 傘兵夾擊

楊岳橋喺補選難得獲泛民協調出戰勝出，但民調顯示投佢嘅受訪者唔少本身係人力、社民連同民主黨嘅支持者，加上梁天琦、「國師」陳雲、甚至「中出羊子」等本土派人士都表態喺九月要分一杯羹，料選民屆時會各自歸位，投回屬意嘅政黨，楊岳橋分分鐘要做最短命議員。

至於梁家傑於一二年九龍東直選得票係泛民嘅尾席，九月由原名單排第二嘅譚文豪披甲上陣領軍，吸票力有幾高固然係未知之數，但加上傘兵、本土派齊齊落區互相「鎅票」兼「鬼打鬼」，公文袋能否力保五區直選議席，似乎險過剃頭喇。