話說從前有個細路仔懶惰成性，飯來張口，衣來伸手。有次父母出遠門，用繩串起幾塊燒餅掛喺佢頸上，以為可以自己食，點知個細路實在太懶，食完前面嘅餅，連伸手攞後面嘅餅都懶，結果就咁餓死。
咪以為淨係講故事吖，現實中真係有咁嘅例子(o架)。一直以來，中央都好照顧香港，幾乎有求必應，弊在香港自己唔爭氣，白白浪費唔少優惠政策。呢，正在北京召開嘅兩會例牌承諾支持香港，其中十三五規劃港澳專章仲提到多項挺港政策，包括支持香港鞏固及提升國際金融、航運及貿易三大中心地位，推動商貿及物流等高端、高增值行業，又話會推動內地與港澳開展創新及科技合作，協助本港發展創新科技事業並培育新興產業添。
北大人對香港無微不至，無疑用心良苦，但香港能唔能夠受惠，就要睇自己造化嘞。其他唔講，淨係發展創新科技就令人不敢樂觀，港府一向講多過做，加上反對派阻頭阻勢，連成立創科局都一波三折，拉鋸三年幾至可以掛牌，你話點樣發展創新科技吖？再講喇，本港經濟結構單調，科研人才出路狹窄，英雄無用武之地，加上全球各地不斷出招吸納人才，本港人才不斷外流，憑咩同人競爭吖。最好笑嘅係，版權修訂條例搞到要跪低收場，連最基本嘅知識產權保障都做唔到，仲學人講發展創新科技，盞丟架嘅咋。
話時話，中央力撐發展創新科技，香港固然無福消受，就算係其他挺港措施，亦往往事倍功半。特別係開放個人遊，本來對本港經濟尤其係旅遊業大有好處，可惜港府一味坐享其成，無所作為，導致人滿為患，激進組織乘機搞事，不斷上演趕客鬧劇，一簽多行被迫改為一周一行，搞到內地旅客避而遠之，旅遊及零售業齊齊步入寒冬。
正所謂，風水輪流轉。內地改革開放三十幾年，莫講話北京上海等大城市早已超越香港，連一河之隔嘅深圳亦步步緊迫，除咗經濟總量就快爬過香港頭，科技產業發展更加係一日千里，成為當地主要經濟動力，吸引唔少世界知名企業落戶，贏得「中國硅谷」嘅美譽添。反觀香港一直原地踏步，不進則退，簡直相形見絀。香港競爭力跌跌不休，優勢所餘無幾，偏偏激進組織仲要踩多幾腳，一時本土化，一時港獨，搞到成個社會紛紛擾擾，永無寧日，你話係咪自殺吖。
西諺就講得啱喇，狗唔會咬自己嘅手。香港有啲人好似故意同自己過唔去咁，係都要倒香港米，簡直匪夷所思。喺咁嘅情況下，就算中央點樣挺港，都係嘥氣喇！