近年來立法會烏煙瘴氣，行政與立法互相扯皮，拉布、點人數鬧得不亦樂乎；政府嘅政策，不管大小，無論輕重——推出一項跪低一項，市民睇見都唔知好嬲定好笑？一項版權修訂條例，由舊年十二月立法會恢復二讀開始，反對派政客瘋狂拉布之下，開會七次，流會五次，開會嘅七十五小時中，「點人數」用咗三十小時，還有「終止辯論」、「休會待續」……你話用來真正辯論嘅時間剩低幾多呢？
更加令人火滾嘅係，高官及一眾議員只識口舌逞強，連武俠小說、希臘神話、白骨精都搬晒出嚟，成個議事堂口水橫飛，彼此互相嘲笑謾罵，愈鬥愈激，成個鬥獸場咁，最終在「官僚無能，政客無良」下，版權修訂條例只落得「就此作罷」四字！老朽也只能加多八個字：嗚呼哀哉！伏維尚饗！
議事堂逢開會不是炮聲隆隆就是亂作一團，個個寸嘴逞口舌騷，高官議員針鋒相對，火爆互質，經濟民生根本冇人關心，議會空轉，一味蹉跎歲月，香港未來只能繼續沉淪。家和萬事興，古有明訓，如今香港，激進抬頭，勇武抗爭有市場，社會想有一刻安寧，恐怕難於「駱駝穿過針的眼」！
弱勢政府百事哀，朽木為官、禽獸食祿下，大事做不來，小事做不好；沒有強勢的管理，根本冇辦法推動經濟，遑論令市民安居樂業。大家睇到新加坡的強勢管理，可說是華人社會裏比較成功嘅例子，新加坡二○一五年人均ＧＤＰ已經突破六萬美元，香港和台灣近年社會不斷分化、撕裂，人均ＧＤＰ增長都比較慢，尤其台灣，已經停在人均ＧＤＰ兩萬美元左右好幾年了！而香港再如此爭拗、撕裂下去，普羅大眾想過有安全和尊嚴的生活，怕只會是敲空米缸唱戲——窮開心！