政情：「鮮忌廉」伴夫回流求醫
在香港回歸前曾任首位女衞生福利司嘅黃錢其濂（鮮忌廉），曾經參選最後一屆立法局議員並成為票后。早年鮮忌廉由外地 回流香港，外界一度猜測佢係為咗再次殺入政壇。鮮忌廉日前接受電台節目訪問時，終於解開呢個多年來嘅謎團，佢話回港係為咗照顧患病嘅丈夫，同大家想像嘅唔一樣。
回憶以往議會冇拉布
現年七十八歲嘅鮮忌廉，近年已鮮有出席公開場合，日前佢喺電台節目訪問中就大談時事和生活。提到外界曾認為佢回流香港係為咗再入政壇，佢解釋回港只係為咗一個人，就係結婚五十六年嘅丈夫黃漢威。佢話，五年前丈夫不幸中風及失聰，為此特意返回澳洲求醫，後來得知有名醫在港，於是同丈夫回流香港定居，並親自照顧丈夫嘅起居飲食。
新一代好容易就決定同另一半離婚，但鮮忌廉就認為結婚係一生一世，仲話唔需要多講說話就知道對方嘅需要。談到現時嘅議會文化，佢話當年議會無拉布，亦無流會，議員動口不動手。