話說人稱「夢熊大師」嘅劉夢熊被判意圖妨礙司法公正罪成，即時收監，喺荔枝角收押所度過兩日鐵窗生涯，櫈都未坐暖，尋日就報稱頭暈送院治療。身穿深啡色囚衣嘅夢熊大師神情憔悴，喺救護車上要用氧氣罩協助呼吸，「夢熊氣短」，都算折墮咯。
呢，夢熊大師真病定詐病，只有佢自己心知肚明，大家淨係知道，出得嚟行，預咗要還，做得監躉，苦日子預咗有排捱嘅嘞。講真，過去即使殺人越貨嘅江洋大盜，臨殺頭前都識得強作鎮定，高喊「腦袋掉了不過碗口大的疤」、「十八年後又一條好漢」，何況夢熊大師唔使殺頭，只係坐十八個月嘅啫，咁就嚇到跪低入廠，弱雞啲啩。仲話乜嘢「去留肝膽兩崑崙」，「雞膽」就差唔多。
正所謂，失去咗先至覺得珍貴，夢熊大師啱啱入獄就要入醫院抖氣，可見佢家陣最嚮往嘅就係自由嘅空氣，最希望嘅係身上能夠生出一對翼，飛出高牆鐵網。話時話，雖然話獄中粗茶淡飯，唔係橙就係瓜，但勝在每晚都有兩隻雞翼吔，你知喇，古人話以形補形，佢老哥食多咗雞翼，話唔定真係可以生出一對翅，咁咪可以自由高飛囉。如果嫌食雞都未夠，佢老哥或者可以考慮將「夢熊」改名為「夢雞」，反正雞膽配夢雞，都算一絕吖。
講到呢度，功夫茶諗起一件事，就係夢熊大師佢老哥臨入冊之前交代後事，專登接受壹淫媒專訪，大爆所謂「政治炸彈」，結果係點？政治炸彈就冇嘞，政治屁彈就有份。係就係得啖笑，但由此亦可以睇出，夢熊大師同壹淫媒同聲同氣，同淫媒老闆肥佬黎關係匪淺，臭味相投。
又係嘅，曹操都有知心友，夢熊大師同肥佬黎一拍即合，其實一啲都唔奇怪，事關佢兩個一樣咁反政府，一樣咁唯恐天下不亂，一樣咁大嘴巴。睇番佢兩個經歷亦非常相似，同年出生，同樣來自廣州，同樣偷渡來港，同樣先打工後經商，仲同樣咁鍾意玩政治添。仲有吖，肥佬黎因參與佔領被捕，更因為涉黑金案畀老廉查緊，連有案在身都係一擔擔，難怪咁投契喇。家陣夢熊先走一步，肥佬黎可能好快就步其後塵，荔枝角又好，赤柱又好，第時做埋鄰居都話唔定，一個鷹犬、一個狗熊，兩個老友鬼鬼，到時咪可以繼續密密斟反梁大計囉。
講開又講，踏入初春，就快又到清明節，唐代杜牧嘅名句︰「清明時節雨紛紛，路上行人欲斷魂」，對失去自由嘅夢熊大師嚟講，就肯定係「獄中氣短欲斷魂」嘞，點都好啦，清明時節陰氣較重，一熊一鷹都係各自好好保重喇！