政情：被寸窒住楊岳橋出師不利
啱啱喺立法會新界東補選中勝出嘅公民黨（公文袋）楊岳橋（Alvin），尋日宣誓成為立法會議員，當大會進行第二條口頭質詢時就已經急不及待要貢獻佢嘅「第一次」，追問商務及經濟發展局局長蘇錦樑（Greg蘇）有關《競爭條例》事宜。不過，Alvin嘅「處男問」就唔多暢順，唔止被立法會主席曾鈺成窒住，Greg蘇仲要暗寸佢「咁非常簡單嘅知識」都唔知，認真出師不利。
追問Greg蘇「簡單知識」
Alvin尋日喺會上問及競爭事務委員會有冇實質時間表及路線圖進行檢討、同當局認為圍標問題係咪嚴重。Greg蘇就對佢呢個議會新丁大耍官腔，話競委會正做研究，又話如懷疑有犯法情況出現，就提交資料畀競委會調查。Alvin聽完即刻話「好驚訝」，但隨即被曾鈺成窒住，話唔可以在此進行辯論。Alvin惟有改為再追問圍標問題係咪嚴重。不過，Greg蘇都係「重播」之前嘅答案，仲寸嘴話有關問題係「非常簡單嘅知識」。
Alvin一入立法會唔止提問同發言，仲加入拉布行列要求響鐘點算法定人數。佢亦報名加入咗保安、司法及法律、發展、交通等最少四個事務委員會，直言「唔嘢小」。不過，今屆任期只剩下幾個月，若九月大選未能重返議會，咁就可以休息吓喇。