政情:EQ蔣麗芸花贈女戰友

雖然三.八婦女節下周先到,但兩位立法會議員葛珮帆(EQ)同蔣麗芸(Ann)就率先送花予於立法會工作嘅女職員同九位女議員,話要多謝大家喺過去幾年嘅拉布日子犧牲同家人共聚嘅時間,一直緊守崗位。唔講唔知,EQ話秘書處職員同保安員當中有三百八十五位女性,而喺佢同Ann同一層辦公室中,就已經有三十六位女職員,希望透過送花,可以氹到佢哋開心。

趁婦女節多謝老公

講起大家過往點慶祝婦女節,阿Ann就話佢老公梁海明至叻就係講日日都係婦女節、日日都係紀念日,同埋日日都係紀念!似乎阿Ann有啲不滿咁喎。不過,阿Ann話:「佢(梁海明)健康我就最開心。」真係甜到漏。阿Ann又提到,老公都好辛苦,因為平時要返工,周日都要接載老婆出席活動。EQ聽到阿Ann咁講,都連聲話有個識揸車嘅老公好緊要,仲話睇嚟婦女節要掉轉多謝老公喎。

第一手消息請下載on.cc東網iPhone/iPad/Android/Windows Phone Apps