中環出更：貪湯孤身赴京黑口黑面

全國人大政協「兩會」會議今日喺北京開幕，多名港區人大代表、政協委員近日都陸續上京。受貪腐醜聞纏身嘅「貪湯」前廉政專員湯顯明，尋日獨自搭的士前往機場，落車之後頭耷耷步入貴賓室。被傳媒問及貪腐醜聞會否影響中央對佢嘅睇法，佢並無作任何回應，只係黑口黑面咁扮聽唔到。

早前獲律政司「放生」不作刑事檢控嘅湯顯明，其實仍未完全「甩難」，事關廉政公署已去信公務員事務局，要求跟進湯顯明事件。尋日早上十一時左右，一身黑色打扮嘅湯顯明現身機場貴賓通道外，隨身只帶同一件手提行李，未見有酒類物品。

由於佢一直以來都未有正面回應事件，所以一落車就被追問會否影響中央對佢嘅睇法。不過，面容憔悴嘅湯顯明一度黑面兼扮聽唔到，並無回應任何提問，只係急急腳步入貴賓通道。

除咗湯顯明，尋日仲有多名人大、政協上京，包括香港大學校委會主席李國章、工聯會理事長吳秋北、立法會議員林大輝、理工大學校長唐偉章、創新及科技局局長楊偉雄等，貴賓通道外一度車來車往，行李堆積如山。