中環出更：「森」巴之旅盡興 無懼寨卡
香港都會扶輪社日前舉行創社十周年晚宴，數百政商界名流濟濟一堂。中華廠商聯合會名譽會董蔡少森（Philip）同太太Anne精神奕奕現身，皆因兩人啱啱去完阿根廷、烏拉圭及巴西等南美洲國家玩，期間適逢巴西舉行嘉年華盛會，玩得極盡興。咦？去巴西？唔怕疫情仍未受控嘅寨卡病毒咩？Philip笑稱，唔去偏僻多蚊嘅地方咪得囉，仲話嘉年華會啲人多過蚊喎！
Philip夫婦講完南美遊歷，轉頭見到菱電集團主席胡曉明（Herman）即雞啄不斷。Philip話，三人係加州大學柏克萊分校校友，佢同太太係同班同學，Herman則係師兄。Herman自爆當年負責搞派對，Philip就話自己梗係要去捧場啦，因為要物色個老婆返嚟，真係搞笑。
胡曉明搞山西節嘗美酒
身兼山西商會會長嘅Herman最近忙緊籌備第一屆山西節，形式除咗介紹豐富嘅古蹟文物之外，自然少不了美食佳餚。Herman話，山西嘅刀削麵及陳醋好出名，佢就最鍾意汾酒，希望山西節可以年年舉辦下去。
同場仲有理工大學校長唐偉章、金紫荊女企業家協會主席彭芷君（Gigi）等人。唐偉章使出渾身解數夾Band表演，帶動一眾賓客起身大跳熱舞，令晚宴氣氛好高漲。Gigi則出席支持好友兼晚宴籌委會主席鄭美恩。身兼都會扶輪社創社社長嘅廠商會會董鄧錦添見咁多老友嚟捧場，當然開心啦。
卓妮