書中自有黃金屋，書中自有顏如玉。如果話知識係財富，咁圖書館就係大寶庫，偏偏本港公共圖書館愈做愈縮，唔怪得香港停滯不前喇。
嗱，立法會秘書處發表研究報告，本港圖書館登記讀者持續上升，但服務使用量就全面下跌，多項指標包括借出書籍數量、到訪人次、查詢次數、外借多媒體項目等全線下跌，其中借書量及外借多媒體項目更十年間累計下跌一成一及五成二添。最令人諗唔到嘅係，在線閱讀日漸普及，但電子書借閱量居然不增反減，喺一一至一四年間下跌百分之七。如果公共圖書館係私人企業，以咁嘅「業績」，想唔執笠都幾難。
即係咁，隨住互聯網普及，市民閱讀習慣改變，圖書館傳統服務需求下降並唔出奇，無紙化閱讀更加係大勢所趨。但正因為咁樣，公共圖書館更加需要革新轉型，善用資源，提高成本效益，否則存在價值只會愈來愈低嘅咋。做人要與時並進，圖書館服務亦係一樣，面對無可逆轉嘅科技潮流，當局有冇相應提升服務吖？有冇主動宣傳同推廣吖？有冇大力鼓勵讀書風氣吖？如果乜都唔做，梗係每況愈下喇。物競天擇，適者生存，公共圖書館再唔與時並進，盞畀時代淘汰嘅咋，到時官僚失禮事小，削弱競爭力事大吖。
歸根究柢，公共圖書館服務面臨萎縮，最主要原因唔係需求下降，而係服務不孚眾望。就講館藏資料吖，按去年人均計算，圖書館館藏量只得一點九項，遠遠低於國際標準。而電子書更加只佔整體藏量嘅百分之一點七，佔整體圖書館借出量嘅百分之零點三。睇吓人哋新加坡吖，電子書館藏量五年內急增近三倍，一四年達到三百五十萬冊，足足係香港嘅十八倍，簡直蚊髀同牛髀。本港公共圖書館故步自封，尤其電子書發展緩慢，唔趕客至奇喇。
更抵鬧嘅係，館藏量已經不足，仲要分布不均，觀塘、深水埗、葵青、屯門及元朗等貧窮地區，按人均計算嘅館藏量最少，變相剝削清貧子弟向上流嘅機會。書本都有教喇，知識改變命運。基層家庭理應最需要公共圖書館服務，偏偏當局投放資源最少，咁就唔怪得跨代貧窮愈嚟愈嚴重，更唔怪得港產官僚畀人批評愈嚟愈反智喇。
無論點講都好，書本係知識嘅寶庫，而知識係社會同經濟發展嘅動力，公共圖書館嘅職責可以話係任重而道遠，港產官僚唔好懶懶閒嘞。當然喇，市民亦應好好利用資源，珍惜閱讀機會。古人讀書機會少，「鑿壁偷光」、「囊螢映雪」嘅故事家喻戶曉，今日大家輕易就可以博覽群書同借書，無謂白白浪費，令公共圖書館淪為大白象吖！