「造王」不成而淪為階下囚——「夢熊大師」聞判罪成後，記者問佢有乜說話要跟梁振英講，佢拋下廿四字「真言」：「惡有惡報，善有善報，若然未報，時候未到，時候一到，一切都無！」大師即係大師，人哋話「時候一到，一切都報」，佢化腐朽為神奇，已預知自己「時候一到，一切都無！」
唉！早知今日，何必當初，搞到自己「我自戇居向天笑，兩翼一橙慘慘慘」？一條泳褲闖香江嘅夢熊大師從商多年，撈到風生水起，可惜不安於室，求官不遂，早排更捲入串謀詐騙案，雖然逃過一劫，但他以為自己是「螞蟻啃骨頭——力小志氣大」，竟然向特首及廉政專員發電郵，要求終止廉署對他的調查，結果威脅不成，反搞到自己「人在囚車灑淚時」。主說：「伸冤在我，我必報應。」如能反躬自省，心領神會，老朽相信一個人做錯了事，仍會有所進步。之但係不承認自己「唸歪了經」，咁就會泥足深陷而不能自拔。
呢輪紅爆嘅「火爆姐」借報應罵盡梁班子嘅「狗官」，夢熊大師亦可能受到感應，一時又攞出嚟贈給ＣＹ。唉！官商勾結從來都冇乜好下場，古代有呂不韋、沈萬三、胡雪巖，今天有許仕仁、薄熙來，真係史不絕書。可惜人不會真正從歷史得到教訓，卻企圖「歷史將宣判我無罪」，世之搞笑者，真係莫過於此。
講起報應，其實未必惡有惡報。像文革的主要煽動者康生是個千面人，既是國際專家，還是老資格的審美家和馬克思主義理論顧問，寫得手飄逸灑脫的好字。然而，這個蛇蠍小人貪婪掠奪，害人成性，生活糜爛，故而結怨甚眾，之不過佢卻得以善終，得年七十七歲，而且其喪事備極哀榮，在他之前，共和國史上鮮有人享受過如此盛大的葬禮。由此可見，報應是否「一切都無」，亦因人而異。