中環出更：獅城度歲 李文恩食撈起
農曆新年長假期係唔少人出國旅遊嘅高峰期，香港青年工業家協會早前舉辦新春團拜活動，卓妮見到該會執委兼理文化工首席執行官李文恩與太太Lorinda，佢哋就同家人去咗新加坡過年，話當地人每逢農曆新年必食「撈起」，即魚生與蔬菜絲逐一加入撈埋一碟，每加一款食材就要講一句恭賀說話，然後邊拌勻邊講「撈起、撈起」，寓意風生水起，愈撈愈旺。
當日團拜晚宴有唔少成員都以中國服飾現身，見李文恩夫婦套衫中西合璧，又夠傳統特色，原來係Lorinda幫老公親自挑選，仲話唔同牌子碼數都有差異，所以每次都攞住老公件衫去買就最穩陣喇。李文恩就話，平日工作除咗出席活動外甚少着西裝，今次呢套有中山裝元素嘅服飾就覺得好舒適，會考慮着多啲喎。
工業家團拜 堪輿家駐場
香港青年工業家協會基金會常委顏吳餘英同擔任協會執委嘅囝囝顏志永亦有到場，顏太喺今個農曆新年就同一大班親友去咗日本大阪，顏太仲拉埋老公陪佢一齊排隊買手袋，婦唱夫隨。
至於會長張華強就喺晚宴玩玩新意思，請來堪輿學家講解流年運程，又教睇相，氣氛好熱鬧。張華強同老婆Gigi啱啱由日本四國返港，兩人拍拖自駕遊，相當浪漫。Gigi話，平日喺香港好少揸車，畀老公笑話個女仲有天分過佢，所以今次去日本就練習吓，由落機揸到上機，老公就做人肉導航，但錯過鳴門海峽漩渦景點個路口，只係經過望到一眼。
卓妮