係人都知，公立醫院前線人手長期不足，十個煲七個蓋，本來已經捉襟見肘，加上近期私營醫院不斷以高薪挖角，吸引唔少人跳槽，更係雪上加霜。
前線醫護流失有幾嚴重？醫管局數字顯示，一四至一五年度全職醫生流失率係百分之四點四，高過對上一個年度嘅百分之三點九；而全職護士流失率就繼續維持喺百分之四點七嘅高位。仲有吖，未來幾年有多間公、私營醫院相繼啟用，人手更加緊張，近期已經有私營醫療機構密密向公院資深醫護人員招手，隨時掀起新一輪跳槽潮。
有公立醫院嘅資深專科醫生透露，最近收到幾個電話，有私營醫療機構出多一倍人工撬佢過去，雖然自己未有轉工打算，但身邊已經有四、五位同事轉去私營醫院，亦有大批公院醫生離開醫管局，轉為大學員工，相信係為過檔私營醫院鋪路。
除咗私營醫院不斷挖角，香港兒童醫院等新醫院後年起將會陸續投入服務，亦係前線醫護人員跳槽嘅誘因。你知喇，家陣前線人手短絀，已經做到有氣冇碇抖，去到新醫院做開荒牛，壓力更大，想唔影響士氣都幾難。部分前線醫護已經講到明，如果被迫調去新醫院，將會索性轉職私院喎。
最不可思議嘅係，面對殺到埋身嘅離職潮，醫管局仲滋油淡定，一味耍官腔，話已經推出多項措施紓緩前線醫生工作壓力，積極增加人手，以及不斷優化醫生工作條件，挽留人才喎。事實係咪咁呢？好多離職醫護人員反映，喺公院工作唔止壓力大，而且一切要聽上司指令，乜都要做，令人覺得好冇尊嚴，反而私院工作規範清晰得多，輕鬆得多。所以話，醫管局所謂優化工作條件挽留人才，純屬吹水嘅咋。
即係咁，人望高處，水向低流，打工仔另謀高就無可厚非，問題係公立醫院服務市民，人手不足唔止會影響士氣，而且可能造成醫療事故，打錯針輸錯血斷錯症開錯刀等意外隨時陸續有來。即使市民好彩冇遇着醫療事故，淨係輪候睇症都輪到頸長，分分鐘小病變大病，大病變冇命。好似呢排流感高峰期咁吖，公立醫院急症室輪候時間郁吓就要十幾粒鐘，搞到怨聲載道。為咗應付前線醫生嚴重不足，醫管局一度出動銀彈政策，以特別津貼吸引醫生喺公餘時間加班睇症，可惜姿勢多過實際，始終解決唔到問題。
始終都係嗰句︰人嘅因素第一。施政報告承諾未來十年新建、擴建及重建多間醫院，話就話可以增加五千張病床，但如果人手短缺問題唔解決，講乜都係嘥氣！