鬍鬚曾做咗九年財爺，年年財政預算案嘅「派糖」成了指定動作，講真，市民大眾都明知係「加減遊戲」，今年嘅「派糖」，稍為畀多少少甜頭中產階層，而公屋未再免租一個月，自然又惹來「劣評」未照顧基層！
之不過咁，不患寡而患不均，住公屋本身已是優惠，是以有人認為，若然又經常免租一個月甚至兩個月，係「雙重優惠」！老朽乃夾心階層，樓買唔起，公屋又冇資格申請，焗住捱貴租。不過，做租奴又好過做樓奴，皆因認同「不要讓五百呎綁住你的青春」，雖則青春已逝一事無成，依然無悔做無殼蝸牛。其實，如果話公屋戶冇得免租係對基層涼薄，咁啲住喺劏房嘅基層又如何呢？財爺有冇諗過為約八萬六千多劏房戶交一個月租金呢？佢哋比起住公屋嘅應更有資格發聲！
有關預算案嘅亮點，似乎今年不在「派糖」，反而是鬍鬚曾一反常態，加入不少個人色彩，尤其處處暗寸ＣＹ，佢分析社會矛盾，直指問題係「人為」，提及旺角暴亂，所用字眼與ＣＹ嘅強硬明顯有別，佢又力撐本土、推崇港產粵語電影、廣東話，被記者問到有關言論是否直指ＣＹ；鬍鬚曾立刻使出「不挑不格，消打同時」咁話：把責任歸咎於一個人並不公平，包括自己在內的所有人都有責任。
睇來政圈盛傳佢有意更上層樓競逐特首，並非無的放矢，佢未曾斬釘截鐵表明不會參選特首，同文認為「暗戰陸續有來，好戲還在後頭」，正合老朽之意；鬍鬚曾唔會話「Ｎ屆都唔會選」，蓋講得太死冇彎轉有時會令自己尷尬！「萬事由天莫強求，何須苦苦用機謀？飽三餐飯常知足，得一帆風便可收。」在「權力是強烈的催情劑」面前，試問有幾人能頂得住誘惑？鬍鬚曾即使「苦苦用機謀」而不是「憑着愛」，亦人之常情而已。我明，我真係明喎。