政情：公民講場：臨老扮嬉皮 財爺愛作反

財政司司長曾俊華（鬍鬚曾）日前喺財政預算案結語上，引用《憑着愛》歌詞引起熱話。佢尋日自爆其實仲有兩首入圍金曲，包括喺美國經歷社會運動時誕生嘅Scott Mckenzie《San Francisco》，但愛本土嘅鬍鬚曾最終揀番廣東歌憑歌寄意。鬍鬚曾解畫話，《San Francisco》其中一句歌詞「There's a whole new generation, with a new explanation」（有一整代人，對世界有一種新嘅詮釋），準確描述當時美國青年人嘅躁動。其實睇番歌曲歷史背景，六十年代反對越戰嘅美國年輕人開創嬉皮（Hippie）文化，佢哋主張以和平手法挑戰社會既有規範同傳統道德觀嘅「禁區」，唔通鬍鬚曾想臨老再做嬉皮士，帶領年輕人「和理非非」咁作反？