政情：郭榮鏗唱反調 Greg蘇鬧爆
《二○一四年版權（修訂）條例草案》自去年十二月喺立法會大會恢復二讀以來，短短兩個多月就發生五次流會，流會多過開會，審議進度緩慢，拖垮其他議程，首當其衝係剛宣讀嘅財政預算案審議。商務及經濟發展局局長蘇錦樑（Greg蘇）繼日前「跪低」預告或會撤回草案，將責任全歸咎泛民主派「拉布」後，尋日再點名炮轟公民黨法律界議員郭榮鏗唱反調，唔明點解對方無跟隨律師會立場支持草案。
鑑於泛民「拉布」持續，財政預算案審議又迫在眉睫，Greg蘇無計可施下不得不「讓路」，日前宣布若本周未能通過草案，便會就此作罷。眼見「死線」在即，商經局尋日喺多份報章刊登廣告，呼籲立法會議員為香港整體利益着想，及時通過草案。Greg蘇同時表示，香港律師會及大律師公會均支持草案，認為未與版權擁有人有共識前，不應強行加入泛民提出嘅修訂，更點名狠批郭榮鏗唔跟隨律師會嘅立場。
「綁架」主體草案 逼人讓步
其實大律師公會轄下嘅知識產權委員會早前已經發表立場書，直指立法會應該將草案「袋住先」，但本身係大律師嘅郭榮鏗就公然唱反調，代表網民提出修訂，要求政府與版權業界進一步豁免網民侵權行為，最終被大律師公會批評為「綁架」主體草案，迫使他人讓步。郭榮鏗唔單止建議豁免侵權行為，就連應予譴責嘅旺角暴亂事件，佢都「隱形」無聲無氣，難怪法律界內持續有聲音批評佢枉為法律界代表，倒不如退位讓賢喇！
蘇亦點名指莫乃光「轉軚」
除咗郭榮鏗，Greg蘇亦有點名批評資訊科技界議員莫乃光「轉軚」，由最初指就算泛民三個修訂唔通過都會支持草案，到現時更反口唔認數，令人感到非常可惜。另外，有傳泛民準備於周三立法會大會上，就草案提出中止待續，Greg蘇指如果傳言屬實，即等同抹殺議員剩低嘅討論時間。其實喺泛民持續「拉布」下，本周通過草案嘅機會微乎其微，即使泛民唔提中止待續，相信最後都要由建制派出手提中止待續，畀政府撤回草案。