中環出更：郭偉強抱假Ｂ 父愛滿瀉
工聯會立法會議員郭偉強日前一索得男可喜可賀，但佢未放夠三日男士侍產假，尋日已經復工出席財務委員會會議，成功爭取立法反而幫唔到自己放假，認真諷刺。不過，對比放假，郭偉強自言寧願爭取連任議員賺多啲奶粉錢，犧牲自己嘅侍產假喎。
「父子」請願爭五天侍產假
郭偉強尋日帶埋假BB公仔請願，要求將打工仔嘅男士侍產假追上公務員，即係享有五天全薪侍產假，雖然佢只係抱住假BB公仔，但新手爸爸依然父愛滿瀉，仲幫假BB笠帽以防冷親添。佢哋引述調查指七成二受訪者認為七日侍產假先足夠，近九成三人認為侍產假應該獲支全薪。
郭偉強訴苦話，立法會經常加會，過去五次產前講座，甚至產前視察產房，佢都陪唔到太太出席，搞到佢有啲「嬲嬲」，所以早已承諾會陪太太入產房生BB。佢話，爭取連任係首要目標，轉戰直選冇回頭路，一旦當選，BB未來四年都有安穩生活，唔放侍產假又有乜所謂喎。
卓妮