今時今日，人才就係財富，人才就係競爭力，爭奪人才已經成為全球大趨勢。偏偏香港唔爭氣，吸引唔到人才不特止，仲要面對人才流失危機添。
嗱，北京下月起實施港澳特殊人才和家屬定居及落戶新政策，吸引本港及澳門創新創業高層次人才，合資格者唔止可以獲得內地永久居留權，配偶及未成年子女亦可申請同行，並享有聘用外籍家傭及個人經濟擔保等二十項入境政策優惠，政策先喺北京中關村試行。中關村被譽為「中國硅谷」，科企雲集，潛力無限，都幾有吸引力（口架）。
其實，內地近年發展迅速，求才若渴嘅又點止北京吖。上海為咗招攬港澳人才，過去多次推出相關政策，又降低申請戶籍門檻，又簡化審批程序，又擴大行業範圍，又提高優惠政策，不知幾咁進取。廣東省更加大開門戶，擺明車馬爭奪港澳人才，深圳當局仲為外地人才提供租金津貼添。
咪以為內地城市對港人吸引力唔大吖。今時唔同往日，中國已經成為全球第二大經濟體，北京、上海等城市發展一日千里，經濟實力、城市規劃、生活環境都唔比香港差，甚至有過之而無不及。好似深圳咁吖，近年全力發展創新科技產業，吸引好多世界級企業進駐，搞得有聲有色，生氣勃勃，成為經濟增長主要動力，香港根本無得比，如果你係科研人才，你會點揀吖？
正所謂，唔怕貨比貨，最怕唔識貨。香港近年亦推出唔少吸引人才計劃，又輸入專才，又吸引內地人才，又歡迎港二代回流等等，名目繁多，可惜全部係雷大雨小，效果有限。講到底，人望高處，水往低流，一個地方能唔能夠匯聚人才，主要睇有冇發展機會，可唔可以安居樂業，弊在香港產業結構單調，獨沽金融地產，科技人才未必有用武之地，加上香港居住環境狹窄，空氣質素惡劣，生活壓力沉重，係人都避之則吉喇。咁都未算吖，香港愈來愈政治化、暴力化，搞到家嘈屋閉，永無寧日，淨係旺角暴亂就嚇怕人喇。
係人都知，香港經濟轉型無方，一直搵唔到新出路，其中一個主要原因就係缺乏人才。港府雄心勃勃成立創新及科技局，拋出一大堆發展創新產業嘅計劃，係威係勢，可惜吖，本地科研人才唔多，引入海外人才又唔夠人爭，就算有再好嘅政策及計劃，都係得個講字。
一句到尾，良禽擇木而棲。香港想吸引人才，首先就要創造條件，如果港府繼續不思進取，一味等運到，莫講話海外人才唔上門，連本地人才都留唔住嘅咋。