如果將舊有對模特兒嘅觀念，套用喺現今內地嘅模特兒身上，其實並唔係咁正確，事關佢哋唔單止出騷行天橋，同時會向多方面發展，甚至拍戲做埋演員，金子熙就係其中一個好例子。
今年22歲嚟自山東嘅金子熙，英文名Cindy，外形完美得無可挑剔，五官精緻得嚟又有古典味道，身材更係火辣無比，35-25-37嘅三圍數字名副其實係魔鬼級數，試問如此出眾嘅外在條件，又點可能唔吸引大家嘅眼球呢？事實上，喺2014年投身模特兒界嘅子熙，於首輯寫真中，憑住誘人嘅外形成功令人氣火速上升，加上性感演繹，散發出嘅迷人媚態，令到男士神魂顛倒。除咗喺寫真界同網絡上爆紅外，子熙亦先後喺多個選美及模特兒比賽中獲取佳績，當中包括世界旅遊小姐中國區北京賽區亞軍、山東城市形象大使最佳人氣獎等，呢啲成績唔單止證明佢嘅外在條件優秀，同時佢嘅口才同表演都深得評審嘅肯定。
當然作為一位專業嘅模特兒，單憑選美比賽並唔能夠證明佢真係有行天橋嘅潛質同實力，但大家睇番子熙過往嘅表現，就知道佢能夠喺芸芸模特兒中成功突圍，並非單靠貌美同好身材，勝在表現淡定又自如。佢除咗喺時裝展、內衣展等亮相外，又以車模身份喺青島、山東、天津等車展登場，並且為多個化妝、美容、網絡遊戲等擔任代言，如此眾多嘅演出及工作機會，足已證明佢係個優秀又專業嘅模特兒。
如果覺得唔少進軍演藝界嘅模特兒未曾經過專業演藝訓練，想喺演藝界中大放異彩係妙想天開嘅話，呢個問題絕對唔會發生喺子熙嘅身上，事關佢自細已經練習琴棋書畫，喺13歲時更考取到全國藝術水平認證書法七級嘅榮譽，而喺2014年於中央戲劇學院表演系畢業嘅佢，早就經過嚴格又專業訓練，絕對有實力喺演藝界發展，難怪佢出道無耐，已經先後喺多套影視作品及微電影中演出，而佢嘅演技更係獲得讚賞。
此外，子熙亦係一位時裝達人，憑藉佢喺模特兒界嘅努力，加上喺表演系修讀時嘅知識同埋好學精神，佢嘅時裝觸覺一啲都唔會比專業嘅時裝設計師差，而佢最愛就係為自己設計唔同嘅形象，配合寫真拍攝以唔同嘅造型示人。由於佢形象百變，所以被粉絲冠以「百變女模」嘅稱號。阿妹表示現時會主力喺模特兒界發展，好似上年佢就飛到韓國工作，目的係希望畀粉絲見到佢更優秀嘅一面。
簡介：要評論金子熙嘅外形，用天使面孔同魔鬼身材嚟形容佢則未免過於膚淺，事關佢迷人嘅地方唔單止外在美，仲有一股獨特嘅古典氣質。如果大家想更加了解佢，就要Click入佢嘅微博睇睇喇！
網址：www.weibo.com/gradeking?is_hot=1
出生地：山東
身高：168cm
三圍：35、25、37
撰文：魂