財政司司長曾俊華估錯數早就唔係新聞，本年度亦唔例外，表面上財政盈餘低過舊年預計嘅三百六十八億元，其實加上撥畀房屋儲備基金嘅四百五十億元，盈餘達到七百五十億元，一樣係少估收入多估開支。不過咁，由於未來經濟不妙，未必可以年年財源廣進，尤其係用於假難民嘅開支不斷急升，都咪話唔大鑊。
新一份財政預算案係咁講嘅，下一年度港府處理免遣返聲請嘅預算開支最少要十四億元，其中淨係人道援助開支就達到八點三億元，較本年度急增一點五倍；另外五點八四億元就用於全面檢討聲請策略與加快處理聲請及上訴個案。小數怕長計，用於假難民身上嘅開支不斷飆升，好似財政黑洞咁，你話納稅人係咪冤哉枉也！
由於假難民愈來愈多，導致保安局開支大增三成七，相關人手亦由一百九十八個增至二百一十六個，新增職位包括一個首長級及十七個非首長級；而入境處亦要增加一百八十一個非首長級職位及兩個首長級職位，其中一個新增首長級職位就係特別為招呼假難民而設，條數都幾襟計（口架）。
當然喇，假難民成為港府沉重財政負擔仲係事小，破壞社會治安先至事大。警方數字顯示，舊年被捕或截獲嘅越南非法入境者達到二千二百幾人，較前年大幅上升超過九成；至於舊年被捕嘅非華裔非法入境者則有一千五百幾人，同樣大幅增加超過九成。絕大多數非法入境者都會提出免遣返聲請，千方百計留喺香港搵真銀，有啲打黑工，有啲作奸犯科，恐嚇、勒索、販毒、劈友、打劫、強姦樣樣齊，有啲甚至同本地黑幫狼狽為奸添。正如有人話齋，「人蛇密密來，罪案日日爆」，香港唔七國咁亂至奇吖。
假難民搞到香港雞毛鴨血，納稅人每年仲要花費十幾億元服侍佢哋，唔谷氣就假。講到尾，一切都係港府好帶挈，如果唔係中門大開，來者不拒，又點會搞成咁吖。正所謂，冰凍三尺，非一日之寒，假難民問題已非一朝一夕嘅事，過去當局反應遲鈍，不知不覺，直至東方報業集團發揮第四權功能，鍥而不捨踢爆種種亂象，當局先至後知後覺，承諾檢討機制堵塞漏洞喎。
今時今日連歐洲國家都要收緊難民政策，英國更加要舉行公投脫離歐盟，其中一個考慮就係避免受到難民問題拖累，反而香港呢個彈丸之地居然對假難民來者不拒，簡直匪夷所思。家陣環球經濟陰晴不定，中國經濟面臨下行壓力，新一份預算案估計香港未來幾年平均增長百分之三，可能仲係過分樂觀，香港自顧不暇，仲要將假難民包袱攬上身，想唔死都幾難！