財政司司長曾俊華（鬍鬚曾）尋日發表財政預算案，九年任期內首次選用紅色做預算案封面，話做咗咁多年，要搵到目標顏色唔容易，反問記者今年「靚唔靚」，之後就引述有同事形容預算案「十足似紅封包」，仲要係幾大封添！不過，對於唔同階層，鬍鬚曾呢個紅封包內裏面額就好唔同喇，畀最多就係中小企及中產，免多項收費，又有退稅、增加免稅額等；但基層人士就連公屋免租都冇咗，綜援「出三糧」變番前年「出雙糧」，認真係大細超！
