中環出更：經濟寒冬 卡片「重」拾商機
正值經濟寒冬，商界苦不堪言。中華廠商聯合會（廠商會）日前舉行新春團拜，做高檔包裝印刷嘅紙品包裝業委員會主席何偉權（Ken）就呻話，去年生意係佢入行三十七年來首次蝕本。不過，咭片皇董事總經理鄭重科（Tony）就笑呵呵，事關每逢經濟唔好，好多公司寫字樓大搬細，信紙、信封及卡片都要再印過，令佢成為少數經濟不景嘅得益者，真係有危自有機。
Tony話，去年底其公司開始多生意，原因係企業縮皮。佢哋一向喺網上接訂單，所以收費較平，好景時客戶唔多計較，但不景時就識得慳錢搵佢哋喇！至於初嘗虧蝕滋味嘅Ken就話，廣東道好多名店係佢客戶，形容佢盤生意係零售業嘅寒暑表。
余德明賣廠揸現金
威馬電器創辦人蔡龍威亦大呻生意難做，會董余德明更加索性賣晒間廠，現金揸手好過。廠商會副會長史立德就希望油價快啲上升，帶動全球股市及經濟重拾升軌。
同場仲有廠商會會長李秀恒（Eddy），佢過年時同家人去韓國首爾玩，見到好多嘢值得香港參考，包括一個設計相當有創意嘅貨櫃箱商場。Eddy認為，香港有好多暫未發展嘅土地，可以多多利用設置呢類概念商場。一場去到首爾，梗要去服裝批發勝地東大門行吓，Eddy忍唔住批評政府，業界多次建議推動特色行業批發市場，例如長沙灣時裝城、紅磡珠寶城，但政府態度欠積極，希望政府快啲做實事喎！
卓妮