成語百步穿楊大家聽得多，「百步穿廁」又聽過未呢？如果未聽過，咁就要留神嘞，隨時性命攸關o架。
係咁嘅，康文署轄下牛池灣公園射箭場上月發生罕見意外，「歪箭」飛越防護網及圍牆，再射爆公廁玻璃窗，揭發場地設計錯誤，危機四伏。原來，射箭場共闊五十米，而當局加高嘅防護網只有十五米闊，形成箭靶區背後有三十五米空間無遮無掩，咪搞到流箭橫飛囉。今次都算好彩，只係射爆玻璃，冇射中人，下次仲有冇咁好彩呢？
其實，同類意外唔係第一次嘅嘞。知情人士爆料，射箭場自一一年啟用後經常發生射箭出界事件，唔止公廁「中箭」，遠至停車場甚至籃球場花槽亦曾檢獲箭枝，嚴重危及使用者及途人安全，職員曾經多次向管理層反映，始終未見改善，問你怕未。
最離譜嘅係，發生意外後，康文署居然若無其事，只係修復損壞玻璃就算，並無改善防護網設施，又無任何預防措施禁止途人行經，連警告通告都冇一張，簡直視公眾安全如無物。
係人都知，射箭除咗係有益身心嘅運動，亦係具有一定危險性嘅活動，場地必須做足安全措施，確保萬無一失。港產官僚無心無肺，明知防護網設計甩漏都闊佬懶理，點止失職咁簡單，直頭草菅人命喇。正所謂，意外一次也嫌多。射箭場地話就話已購買第三者責任保險，如果市民不幸被誤傷，可以向場地管理人索償，但係生命無價，萬一有乜冬瓜豆腐，賠多多錢都彌補唔到喇。港產官僚攞市民生命較飛，你話係咪靠害吖！
所以話，港府開口埋口「民生無小事」，根本係吹水唔抹嘴。早喺牛池灣公園射箭場興建前，有團體已經發現設計出現安全漏洞，建議加設一個由頂部落地嘅箭網，以策萬全，點知當局以外觀問題而唔採納。難怪有人話，射箭場設計甩漏，正正反映官僚眼裏面根本無市民。
話時話，康文署轄下文娛康樂場地千瘡百孔，早就唔係新聞咯。好多運動場地日久失修，問題多多，部分甚至每逢天雨就滴水，打羽毛球變成打雨水，打籃球變成打水上足球。最經典嘅係香港大球場，由於去水設計嚴重失誤，加上當局闊佬懶理，結果搞到變成大爛地，被譏為「香港大農場」，淪為國際大笑話。
一句講晒，針唔拮到肉唔知痛，箭唔射埋身唔知驚。射箭場想增加安全設施，唔係話無辦法嘅，將康文署辦公樓搬去箭靶區後面，港產官僚唔想變箭豬，自然會急急補鑊喇！