旺角暴亂被北京定性為係由「本土激進分離組織」策動，但財政司司長曾俊華之前就話，暴亂只係一小撮人非理性行為，唔係本土派行為。立法會主席曾鈺成尋日同傳媒茶敍時，有記者就提到本土派似乎日益壯大，曾鈺成就話要將「本土意識」同「分離主義」分開，後者係連「一國」都唔認，佢認為只有小撮人咁諗，希望中央分開兩樣，唔好打擊本土意識，莫非佢想為激進本土派嘅暴行開脫？
曾鈺成話，「本土意識」有別於「分離主義」，仲話「本土」係指有人唔想香港變成內地咁，避免「大陸化」，希望喺推行政策時，如遇到中港矛盾，要港人優先，做任何嘢都要維護香港特色，而呢個係「一國兩制」嘅特色，無可厚非喎。
此外，有議員認為，如果月底立法會新界東補選由建制派當選，就有足夠票數修改《議事規則》防「拉布」。被問到會否為投票修改《議事規則》而辭職，曾鈺成就話呢個問題會被候選人用以拉票，所以唔答，但就暗示立法會會期剩餘不多，唔夠時間修改，而佢亦要對議會以至社會負責喎。