政情：撐郭榮鏗連任？ 熊運信拒答
立法會選舉今年九月舉行，香港律師會尋日舉行傳媒午宴，會長熊運信（Stephen）就被問及本身係大律師嘅法律界立法會議員郭榮鏗（Dennis）嘅表現，會否支持Dennis連任？Stephen就大耍太極，話依家表態仲係太早，但佢個人意見都係想搵番個事務律師代表佢哋好啲，換句話想攞番議席嘅主導權。
Stephen就話，覺得Dennis相對前任議員冇咁激，又會定期同佢哋開會，但佢個人意見都係想搵個事務律師代表佢哋。其實以往都有律師會前會長出選，今屆會唔會都有律師會中人出選呢？Stephen就澄清，佢哋係以個人身份出選，唔係律師會推薦嘅。
難忘柬埔寨貪污嚴重
另外，據聞Stephen席間提到，之前佢隨律政司司長袁國強到柬埔寨同當地律師會交流同演講，並以貪污同人權保障為題。不過，佢最記得係喺講完之後，當時現場第一條問題係問佢每個月要畀幾多錢法官，佢當時就答「從來都冇」。當地嘅律師即時好驚訝問佢，「咁你咪輸晒啲官司﹖」佢憶述當時除咗苦笑，都唔知講啲咩好嘞。