中環出更：暴亂傷舖 買保險 求安心
全球經濟放緩，本地零售商面對持續挑戰，加上人民幣貶值，奢侈品銷情受到影響，加上早前旺角暴亂，確是雪上加霜，開舖做生意認真慘情。早前香港潮州商會新春團拜上，國際專業保險諮詢協會會長羅少雄就話，有架的士喺暴亂中被毀壞，奈何暴動無得賠償；而一般舖頭買嘅保險亦只包意外，騷亂或暴動都不獲賠償，加上香港發生暴亂嘅機會好細，所以好多人都無買呢類保險。
羅少雄就建議生意人買多份騷亂或暴動嘅保險都無壞，因為發生機會太低，所以保費唔會好貴，主要視乎業務性質及範圍，當然奢侈品舖頭會貴啲啦，叫做買個安心。
胡楚南無懼人仔貶值
雖然外界大致睇淡今年經濟環境，但外號「K金大王」嘅香港潮州商會會董胡楚南就認為，人民幣貶值對K金生意影響唔大，事關K金唔算好貴，價錢一般人都負擔得起，反而一啲售賣名牌手袋、鐘錶等名店就可能會面對收縮情況。不過，佢話公司暫時唔會特別增聘人手，實行精英制。
同場嘅「新小巴大王」馬僑生（Robert）都話，自小巴合法化以來都未見過旺角暴亂呢類情況，又指喺普天同慶嘅日子搗亂係不可接受。Robert又提到，小巴司機年紀開始老化，好多後生仔都唔肯入行，令到依家最少一成小巴路線開唔足，真係唔敢想像幾年之後情況會惡化到咩程度。佢又話，以前考大巴牌會畀多個小巴牌，但現時要讀一個課程先發出駕駛牌照，再次促請放寬牌照制度，或有限度輸入外勞挽救情況。
卓妮