政情：危急之「秋」 工記反對和平
旺角暴亂發生後，多個建制黨派即時站出來譴責暴力，工聯會（工記）昨日亦舉行「全民反暴力、守護香港」遊行，發動地區樁腳以至各個工會屬會出來，氣勢不錯，可惜又再「甩轆」開口嗑着脷。繼上周五立法會議員黃國健回應施政報告致謝議案時講錯「我哋幾時都係企喺打工仔嘅對面」，昨日輪到理事長吳秋北上台發言時，竟然兩度高叫「反對和平」而不自知，要人補鑊更正為「反對暴力」，看來呢對難兄難弟真係要專心啲至得喇！
兩度講錯 黨友補鑊
工記聲稱發動約一千三百人遊行，但警方指高峰期只有九百人參加，工記帶同國旗及多個紙牌口號，有磚、火、恐龍甚至憤怒鳥圖案表明反暴力，仲準備禁暴力貼紙給參加者貼在紙板表達意見，由灣仔遊行到警察總部遞交請願信。本來個勢都起得唔錯，點知吳秋北上台發言時，高呼「今日出嚟係要守護香港、反對和平」，佢無為意自己講錯，搞到台下議論紛紛，工記中人「唔知好嬲定好笑」，非工記人就自然陰陰嘴笑。
黃國健「企打工仔對面」
正所謂「一不離二」，之後吳秋北又再講多一次「反對和平」，他才開始顯得有少少猶豫，但都無澄清，莫非真係「反對和平」？及後主持之一、立法會議員鄧家彪就幫手補鑊，指工記一定是「反對暴力」，為吳秋北「甩轆」打圓場。其實工記黃國健上周五回應施政報告致謝議案時，提到點解工記部分議員要投支持票時，講錯「我哋幾時都係企喺打工仔嘅對面」，隨即被網民寸爆工記講出真心話，認真倒米。
立法會議員黃毓民早幾日在保安事務委員會上批評工記當年主導六七暴動，是最無資格指控他人 使用暴力。昨日由工聯會主辦遊行，自然被人質疑。工記會長林淑儀被問及應否向當年死傷者道歉及譴責示威者時，就話「唔同時空有唔同嘅，所以唔可以簡單去比較」，輕輕帶過問題。林淑儀又稱，示威者暴力程度令人目瞪口呆，又認為愛護本土無問題，只是若將之變成分離中國，就是禍國殃民。