一小撮港大學生，有書唔好好去讀，一味搞衝擊、抗爭，早前嘅所謂「罷課委員會」發動罷課失敗，根本冇乜港大同學響應，事件尋且引來反效果。老朽上東網睇到以署名「港大同學會」製作反罷課委員會嘅橫額，標題寫上「我要真讀書，你不代表我」，並指「好心比（畀）條生路師弟師妹，你地（哋）前程似錦，我地（哋）分分鐘畢業變失業！」
昔日之天子門生，今淪落至哀求「畀條生路行吓」，老朽睇見都心翳。七十年代，老朽隔壁同鄉個仔港大未畢業，最後一年已做定西裝，準備去見幾份大商行嘅工，好工排住隊等佢哋揀；如今有教授書唔教鼓吹佔中，學生則一味橫衝直撞，不理好醜搞對抗，有書唔讀情願瞓馬路衝擊校園，咁搞法，港大排名有乜道理唔跌跌不休，如今終於有學生發出「我要真讀書」嘅呼號！
其實，讀書有乜真唔真啊！老朽珍藏嘅陳年小學紀念冊，小朋友都識寫幾句驪歌高奏嘅各奔前程贈言，甚麼「黑髮不知勤學早，白首方悔讀書遲」；甚麼「世間唯有讀書好，天下無如吃飯難」；有一個最堅，竟然寫下「古今多少世家無非積德，天下幾多聖賢還是讀書」。當年老朽深感奇怪，這已超越「又是一年春光好，正是發奮讀書時」的境界，皆因從積德去到讀書，已非一般六年級畢業生的認知，這種「真讀書」的境界，如今的港大生才如夢初醒！
「真讀書」去到一個境界，即孔子所說的「修己以敬」，進一步去到「修己以安人」，最後去到「修己以安百姓」。否則，一味如盲頭烏蠅，好歹不分，是非不明，既不知「敬」，更不懂感「恩」，橫衝亂撞，「明德格物」只會淪為空言笑話！老朽亦寄望港大學生能真讀書，為香港未來作出真貢獻！