好多人都想瀟灑咁活出一生，只係各種原因，往往令生活變得壓抑，甚至感到沮喪。不過對於內地性感索模游瀟瀟嚟講，人生路縱然難行，但佢抱住樂觀嘅態度及輕鬆嘅心情面對，並散發出迷人嘅魅力及動人氣質，難怪深受粉絲愛戴。
今年28歲嘅游瀟瀟，憑住美貌及火辣身材令大家對佢留下深刻印象，點解佢外形咁標致？唔係因為佢嚟自盛產美女嘅重慶，亦唔係有乜嘢美容法寶，而係佢天生擁有迷人嘅魔力。其實呢點都唔足以令人妒忌，皆因一位索模擁有誘人嘅外在美，卻欠缺獨特氣質，始終會有睇厭嘅一日。而瀟瀟比其他模特兒優勝之處，就係佢有股優雅氣質，令佢着起晚裝時美艷動人，換上性感火辣嘅比堅尼，更係睇到人心花怒放兼血脈沸騰。
有着先天嘅優厚條件，瀟瀟出道冇耐，就被化妝品公司睇中，邀請佢拍攝廣告，及後佢喺多個平面媒體，包括時裝、潮流及汽車等雜誌中亮相，人氣不斷攀升。與此同時，佢亦不忘推出寫真集，以迷人風姿吸引大家嘅眼球。瀟瀟嘅寫真主打唯美路線，即係以優雅嘅構圖配合性感造型示人，唔似一般嘅寫真模特兒咁，以虛掩雙峰、露股罅，甚至係三點若隱若現作賣點，全因佢自信十足，唔需要賣弄色情，就足以成為大家嘅焦點。
瀟瀟除咗有樣貌有身材，仲好有生意頭腦，話說阿妹花上唔少時間鑽研化妝技巧，並對化妝產品有深入認識，於是佢以網購女郎身份推廣化妝及美容產品，據聞生意不俗，認真叻女。此外，佢喺網上直播頻道上擔任直播女郎，同粉絲嚟個直接對話，讓大家可以更了解佢真實一面，而佢為咗每晚可以滿足到大家，曾經試過通宵進行直播工作添！
唔少人總會以為，呢啲直播工作好輕鬆，只係喺鏡頭前講吓嘢就得，咁就大錯特錯，事關阿妹每次進行完馬拉松式嘅直播後，第二日都會感到腰痠背痛，甚至會因此而令生理時鐘亂得一塌糊塗。雖然係咁，每當佢見到粉絲數量不斷增加時，嗰份種滿足感已經勝過一切，令佢充滿能量繼續努力工作，開開心心咁過日子。而佢為咗應付忙碌嘅工作，最近勤做運動鍛煉身體，務求以最佳狀態，畀到大家最好嘅視覺享受。
簡介：游瀟瀟性格樂觀又瀟灑，而所謂嘅瀟灑就係佢唔會追求物質享受，亦唔會因為工作多與少而自嘆，反而更加樂於喺網絡及微博上與粉絲進行互動。如果大家想欣賞瀟瀟迷人嘅寫真，以及了解佢更多，就要去佢個人微博睇睇啦！
網址：www.weibo.com/youxiaoxiao
出生地：重慶
身高：166cm
三圍：33、24、35
撰文：魂